#guestpost على منع السفر على المرأة في مطار الأبرق #مشاركة_قارئة
February 19, 2017
0

بمناسبة ١٧ فبراير اول امس قرروا مرة اخرى يبهرونا بقرار اخر مش شور الموضوع بكل، الي يشوفه يتخيل حياتنا كلها رفاهية و سفر و سياحة.

مافيش حد يسافر في ليبيا توا الا عشان يقرا و لا يشتغل، رجال و نساء، لكن طبعا ديما في قرارات مخصصة لنساء بروحهن، الي حيشوفه شرع و الي حيشوفه حاجة مش وقتها، انا نشوف فيه طريقة عشان يبوا يسيطروا على شي في واقع مش قادرين يسطيروا فيه على اي حاجة.

• كل حاجة في الشرع الإسلامي بعد تنحط تكون عندها سبب، وعند التفكير في الموضوع ( نعم لازم تفكر فيها مش بس الشيخ الفلاني قال معناها خلاص غير قابلة للنقاش، كلنا بشر ونتحملوا الصح و الخطأ ). ليش في الدين الإسلامي طُلب محرم في سفر المرأة أو رفقة أمنة؟ لأن العصر الي أُنزل فيه القرآن الكريم كان يقتضي محرم لمشاق السفر و بعده و قطاع الطرق و السبيّ و ما الى ذلك من أسباب يعني السبب كان لحماية المرأة في ذلك الوقت مش لأنها محتاجة وصاية من حد أو لأنها ماتعرفش الصح و الخطأ بروحها أو حاجة ناقصة تمام ؟ نجوا نشوفوا عصرنا الحالي، هل في من هذا كله؟

• انا توا ليا تقريبا ٦ شهور عايشة في دولة اجنبية بروحي، بعد ما شفت القرار هذا اول حاجة فكرت فيها واو على سخرية الأقدار انا الي نبي محرم عشان نرد نعيش في ليبيا مش عشان نعيش برا! ليا ٦ شهور هنا ماعمره حد ضايقني ولا عاكسني، نمشي بروحي بكل راحة نفسية في سلام، مع اني محجبة في دولة المسلمين فيها حاجة بعد الأقلية، ماعمره حد حتى بحت فيا بطريقة عنصرية، بالكعس تماما. ليبيا تطلع قدام باب حوشكم مايسيبوكش في حالك من المضايقات و المعاكاسات و الي يمشي وراك في سيارة كان تسوقي المهم، يعني الأسباب الي فرضن وجود محرم سقطن صح؟ هل في داعي للموضوع؟

لوّ خذينا مثال بسيط، فرضًا مرأة عازبة حصلت سفرة لدراسة أو عمل. ماعندهش خوت و باتها متوفي أو باتها عنده باقي خواتها مايقدرش يسافر معاها هل من العقل أنها تضيع فرصة دراستها أو شغلها عشان حاجة أسبابها مش قائمة اصلاً؟

مافيش داعي نكتبوا الإجابة إلا اذا في حد محتاج نغششوه و كل سنة و نحنا طبيين بمناسبة قيام ثورة الحريات و الدولة و القانون.

كتابة : a concerned citizen

Artwork by Poo Reun

Leave a Reply