Starry Night : و الكائنات الفضائية

Starry Night, Vincent Van Gogh, 1889

“ رأيت هذا الصباح الريف من نافذتي, قبل شروق الشمس بوقت طويل. ظلام ماعدا نجم الصباح الذي بدا كبير و متوهج”

كتب فان قوق في رسالة لأخوه ثيو. يوصف في الوحي ورا لوحة من أشهر اللوحات Starry Night (1889).

الروشن الي يوصف فيه روشن داره في مصح ساينت ريماي في جنوب فرنسا, لما قعد فيه خلال اضطرابات العقلية مع استمراره في الرسم.

ستاري نايت تقريبا أكثر عمل فني قريب لقلبي لعدة أسباب, نحس فيه حاجة فيها أمل مع الظلام , التموجات و التدرجات في الألوان ساحرة جدا, هذي مش بس في اللوحة هذي, لوحات فان قوق الصور مايعطنهنش في حقهن. في لقطة في الألوان كيف ينعكسن من على اللوحة و لما تشوفهن كيف يأثرن فيك. حاجة تسبب قشعريرة.

Starry Night, Details

يومتها كنت نشوف في تفاصيل اعمال فنية مختلفة, المهم شفت ستاري نايت, التموجات في السماء بذات في نجم المشع فوق, خلاني نتخيله كأنه صحن فضائي.

الإضطرابات في الحركة خلتني نحس كأن في حاجة حتنزل من السماء.

مصطلح Science Fiction بعد حد يستخدمه اول حاجة تخطر في بال اي حد يسمع, كائنات فضائية و صحون طائرة و كرة قدم .. لا مش لدرجة بس هكي ديما يعطي على حاجة مستقبلية فضائية متاع نيردز و star wars.

لكن في الواقع اكثر جينرا مش مفهوم, بعد مانقول نحب نقرا ساي فاي يجيني رد “شن تبي في الكذب هذا” .

ساي فاي مش معناها كتاب يتنبأ بالمستقبل هو عبارة عن نوع أدب يتخيل اسوأ سناريو بناءا على معطيات عند الكاتب . في العادة يكون نقد و إجابة لسؤال “ماذا لو صار ….”

ساي فاي جينرا تسكشف فيه افكار جديدة, سياسية, إنسانية, فكرية, عوالم اخرى كاملة. مثلا تركيبة سياسية للبشر على المريخ مثلا. بس مش كله مريخ و أبعاد اخرى. مرات نفس كتاب جورج أرويل 1984, صدق او لا تصدق هذا ساينس فيكشن.

Political Science Fiction في من يوصف فيه على اساس sub genre.

شخصيا مانشوفش فيه هكي, لاني نحس في انه التصورات السياسية و الأفكار المستقبلية لوين الأنظمة و الاجندات ممكن يوصلن البشرية تبع لساي فاي. في صميمه كله مظلم, اغلبه ديستوبيا .

في sub sci fi جديد توا مثلا يحكي على التغيير المناخي.

ديما نحاول نقعد منفتحة لاراء الناس الاخرى بصفة عامة و مانطلقش احكام هكي و خلاص بس اكثر حاجة ماعمريش فهمتها هي كيف حد يقولي ليش تقري في “الكذب” هذا.. متاع اقري حاجة تاريخ مثلا ولا فلسفة.

من قال مافيهنش تاريخ ولا فلسفة ؟

في كتب ساي فاي يتخيلن في احداث تارخية مختلفة, نفس The Man in The High Castle متاع فيليب كي ديك, يتخيل في شكل العالم لو الحلفاء مافازوش في الحرب العالمية الثانية .. الموضوع مش مقتصر على مخلوقات فضائية, اعمق و اعقد من هكي بمرااحل .

أهمية الأدب كله يخليك تتخيل شكل حياة مختلف, انت مختلف , عوالم مختلفة, لو ماعندكش القدرة انك تخيل عالم مختلف تماما و مش قادر تخيل قدرتك على تغييره, كيف حيتغير؟

ساينس فيكشن عندي شخصيا أهم جينرا لبناء الشخصية و المخيلة.

It’s really sad when people can’t see that.

فأيوا مش كله كائنات فضائية و أبعاد اخرى وناس بتمشي للمريخ, حتى و كان يعني مش حاجة سيئة تجرب تقرا حاجة مش متعود عليها, مرات تعجبك و مرات لا في جميع الحالات شن الحياة إلا مجموعة تجارب سمحة و سيئة .. أقل حاجة بعد نعطوا الساي فاي فرصة نقدروا نقولوا وقتها لا ماينفعش عن تجربة. بس يعني 1984 و the handmaid’s tale من أكثر الكتب الي عليهن اقبال في الفترة هذي.

and both are sci fi 🙂

Starry Night في الأغنية اللطيفة هذي لدون مكالين اسمها in the end

فيها جو.

written by @hajer elmahdi

Share your thoughts