Arabic
يد العون
February 9, 2015
0

IMG_1990-0.JPG

القصة تبدأ بزيارة للنادي الرياضي , وصلت وبدأت في روتين متاعي على طول . معنديش وقت في العادة للهدرزة لان نمشي بعد الدوام مباشرة وعندي 50 دقيقة بالضبط لذلك نحاول نستغل الوقت قدر الإمكان ( بصفة عامة الي نشوف فيهن كلهن يرفعن في نص كيلو او كيلو مايديرن شي، الشنطة متاعك تهيالي اثقل منهن لذلك اذا تبي جسم ممشوق لازم ترفعي اكثر من هكي عشان يكون في تغيير) لكن مش هذا ليش قررت نشارك بقصة الي صارتلي في النادي هنا، الاسبوع الي فات وانا قاعدة ندرب جتني وحدة وسألتني على الروتين متاعي وانا وقتها وقفت و قعدت نجاوب على اسئلتها وحاولت نساعدها على قد مانقدر بعدها خذت رقمي، وانا روحت للحوش فرحانة نقول حوّلت وحدة من جماعة النص كيلو، المفاجأة انها كلمتني وكان عندها اسئلة اخرى، و جاوبتها وقلتلها حنديرلها برنامج عشان تقدر تشوف التقدم متاعها كويس، وهي تبدا تدعيلي وتشكر فيا انا انصدمت قلتلها عادي والله مافيش مشكلة لكن هي قالتلي ان اول مرة تلقى وحدة تساعدها لوجه الله . في الزيارة الي جاية جبتلها معلومات زيادة على سؤالها . الي حيرني في الموضوع أن المرأة تفجاءت من المساعدة . قالتلي أن من النادر انه حد غريب يعطي من وقته بالكيفية هذي . هل لهذه الدرجة المجتمع النسائي متفكك ؟ ما فيش وحدة تساعد أختها هكي من غير مقابل ؟ اقل حاجة نديروها في مجتمع كلهم فيه ضدنا نساعدوا بعضنا يعني .
المرة الجاية تجيك فرصة انك تساعدي وحدة ساعديها وما تبخليش بوقتك.

Written by : an ex twitter addict with a bad coffee addiction

ملاحظة : الصورة المستخدمة لوحة للفنان الإيطالي يوجين دي بلاس. تحت عنوان ” يد العون ” . الأسلوب : المدرسة الأكاديمية (academicism)

Leave a Reply