Arabic
منتجات تجميل
February 7, 2015
0

IMG_1962.JPG

اي حد عنده اهتمامات مختلفة، مش معناها انه كان انتِ تحبي المكياج والدبش معناها سطحية ( انا قعدت اسبوع نتفرج على فيديوات كيف اندير ايلاينر ولا كان تشوفن الشكاير الي نطلع بيهن من انجلوت) هذا كله عادي، ومش معناها المكياج و الدبش والشكل مش مهم، لكن حتكبري وحيطلعنلك تجاعيد وممكن يزيد وزنك وهذي الحياة مش لازم تحاربي الوقت ولا عمرك، كل مرحلة حلوة في وقتها، لكن بدال ماكل تفكيرك منحصر في كيف تنوّري وجهك فكري مرة تغيري شويا وتنوّري تفكيرك، اقري كتاب تاريخ ولا فلسفة ولا رواية. عادي كان خطمت عليك حاجة شور الدستور جربي تقريها، مش لازم كل حاجة وصفات و اقنعة و راجلي جاب وفلانة انخطبت . انتِ كيان منفصل ومش لازم تقعدي ظل لحد، انتِ مهمة ورأيك مهم وعندك دماغ وتقدري تحكمي وتقرري في سياسة وفي الدستور وفي اي حاجة تبيها. معش تحصري روحك في دور الزوجة ، النظرة الدونية لشخصك وافكارك لازم توقف، نحنا مش بس شكل سمح، لانه الشكل والمظاهر كلهن يختفين مع العمر لكن المعرفة وشخصيتك المستقلة لازم تسيّب أثر في محيطك.
Written By : J.E

ملاحظة : الصورة المرفقة لوحة للفنان الأمريكي أندي وارهول . تحت عنوان ” منتجات تجميل” . الأسلوب : فن البوب.

Leave a Reply