Arabic
ملاحظات
February 7, 2015
1

IMG_0841.JPG

عارفين لازم في حد يتفلسف ينطلك في النص و المشكلة الاكبر من هكي تلقاه مش قاري ولا مقال من قبل لكن غير كساحة راس ليبيين و ملاطعة . وانا الحق واصلتلي من الإتهامات الباطلة، واحد يجي يقولي ” انتِ تكرهي الرجالة وماتبيش البنات يتزوجن” مع انه مالهش اسبوع حطنا مقالة اسمها ” نبي حقي مش معناها نكره الرجالة “، يجي الي يقولي “انتِ تبي حرية الغرب الكافر ” مع انه قلنا من البداية والله موحدين ومسلمين و عارفين الإسلام و درنا مقال ” أنا مسلمة واطالب بحقوق المرأة ”  واخرتها ” انتن تحطمن وتهزن على البنات الي يبن يتزوجن “ للمرة المليون اعزائي القراء مانْفهمش القصد من المقالات، الأنثوية “فينينزم” او فكرة انك تقولي انه ” انا نبي نقرا مازال مش مفكرة في الزواج توا “ او ” مازال بدري نبي نشتغل قبل “، طبعا الفلسفة لا نهاية لها ومهما حاولت تشرح لازم من الفلسفة. تِ كنهم ما يبوش يسمعوا؟ خلوني نكملكم،و الي يقول ” يعني اي وحدة تبي تتزوج او تسعى لزواج هذي متخلفة؟ “ وهم حشيشتهم التقسيم وتغيير المعاني، من نبي حقوقي ومانبيش مجتمع يقيدني بتقاليد سخيفة ظالمة و غير منطقية الى “حرب بين المتزوجات والغير متزوجات”. والله العظيم مش هكي، يعني عادي تقعدي فيمينست تقدري تتزوجي وتقعدي ربّة بيت ويقعد اختيارك الشخصي مش حد فرضه عليك. تقدري تقعدي فيمينست و تشتغلي وتتزوجي او ماصارش نصيب وماتزوجتيش برضوا عادي تقدري تقعدي فيمينست، لانه كيف ماقلنا من قبل الأنثوية عبارة عن المساواة في الفرص وفي الدراسة و في الشغل وفي نظرة و معاملة المجتمع للرجل و المرأة في الحياة الإجتماعية والسياسية والإقتصادية. مش معناها المرأة تقعد راجل والعكس. يعني مش عشان انتِ بنت تجي وحدة تقولك ” يانعليا بتقري بشري؟! تكملي عمرك وتضيعي شبابك وفرص عرسان“. يعني ماتزوجتش، شن صار في الدنيا؟ لازم تلقى من يحطمك، مافيش حد يدعمك ولا يقولك ماشاءالله وهذا حلمك ونشجعك، ماتلقيش الا الي تقولك نهايك المطبخ. وياما من قال كنكم اتبلوا على المجتمع “المجتمع الليبي مش بسوء هذا” والله ماجبنا شي من روسنا، هذا الوسط الي عايشين فيه، وابسط نظرة على قروبات النساء الليبية في الفيسبوك توريك مدى ضحالة تفكير الأغلبية المسيطرة على التجمعات هذي، ومن الجامعة و اللمات و بنات العم والخالة والصحبات والانترنت. تهيالي اغلبية القراء فاهمين وعارفين المجتمع كويس بكل. هذا لتوعية عشان مستقبل افضل لنا ولعيالنا مش نظرة دونية للي يبن يتزوجن، الزواج في سن صغيرة وقبل ما اقل حاجة وحدة تتخرج وتشتغل اقل حاجة وتستقل ماديا نحس في خطأ. لكن هذي انا شخصيا، ومشكلة اكثر من حل. لكن مش معناها انه وحدة اخرى تزوج بدري خلاص بلا فايدة، في وحدات واجد يكملن في قرايتهن ويشتغلن ويحققن طموحهن، مافيش معيار للنجاح، هذي تعتمد على الشخص بروحه. لكن الجهل مصيبة، بعد حد مش فاهم ويقولك مفروض ”ماتحكوش هكي لانه في بنات يبن تزوجن بس“ البنات حاليا فاهمات انه الزواج هو المهرب الوحيد عندها. بطاقة بلا عودة للجنة، سوا راجل كويس، سيئ ، يضربها يحترمها يجوعها، اخلاقه شغله، كله مش مهم راجل والسلام. بعد ما بنت عمرها 15,16,22 تقعد عايشة على وهم زواج مسلسل تركي وشهر عسل ودلع والحقيقة مغايرة للواقع تماما. ليش لازم تحصروها البنت في الخيارات هذي؟ انا متأكدة مع التربية الصحيحة والتوعية اللازمة كلهن يعرفن قيمتهن ويفهمن اهمية التعليم وتشوفوا كيف خيارتهن يختلفن، بعد تفهم انها شريك في الحياة الزوجية مش طباخة غسالة والة تكاثر وخلاص.
يعني الخلاصة :
• مش قصة رجالة ضد صبايا.
• مش معناها ماتبيش تتزوجي.
• مش قصة متزوجات ضد مش متزوجات.
• المنطق يقول الأم هي عماد الاسرة والاجيال القادمة يعني أم متعلمة = جيل متعلم ، أم جاهلة = جيل جاهل 

Written By : J.E 

Leave a Reply

1 comment

  1. جديات التفگير السلبي هذا ماشين عليه ناس واجد ومصدقينه وحتى لو تحاول تشرح مستحيل يسمع الا كلمة وحده “البنت مالها الا المطبخ ” -_-