Arabic
مافيش حاجة كويسة
November 26, 2015
0




#مشاركة_قارئة 

أمس كنت في ورشة عمل عن أهداف التنمية المستدامة واللي هما تقريبا 17 هدف منهم النمو الاقتصادي ومنهم التعليم وغيرهم طبعا. المهم إن أثناء الورشة طلب منا إن كل حد فينا يختار 5 أهداف يشوف فيهن مهمة بالنسبة لليبيا لما كملنا وكل واحد فينا أختار لفت نظري أنه في هدف ما حدش أختاره الا أنا, واللي هو المساواة بين الجنسين فطرحت الموضوع وقتلهم “بس ماحدش أختار المساواة كهدف ليبيا فعلا بحاجته”  فكل حد كان عنده وجهة نظر فيه ناس قالت: أنهم مش شايفينها أولوية بالنسبة لليبيا حاليا, وفيه ناس قالت: أنه فعلا فيه مساواة في ليبيا وأن هذا هدف مش محتاجينه أساسا. كان ردي على اللي قال أنه الموضوع مش أولوية في الفتره الحاليه أنه كلامه مش دقيق بالمره, لو مثلا خدينا الموضوع هذا وأسقطناه في ميدان العمل مافيش مساواه معناها ما فيش تكافؤ فرص بين النساء والرجال في الحصول على العمل ومعناها دائما هيكون فيه أفضلية للرجل عن السيده بس لأنه “رجل” مش عن عشان كفاءه ومؤهلات أفضل,وبالتالي هيكون عندي أشخاص غير مناسبين موجودين في وظائف محتاجه كفاءات أكبر ومدى تأثير حاجه زي هكي على وضع الشركات هذي ومتهيالي أحنا فاهمين وعارفين كويس كليبيين شن معنى ناس تفتقر للكفاءه وقاعده في وظائف لا بل وظائف مهمه, كذلك الناس اللي تقول أنه فيه مساواة في ليبيا وأحنا مش محتاجين الكلام هذا, طبعا فكرة أنه ما فيش مساواة حقيقه واضحه ومثبته بالآدله والبراهين, بس لو مثلا كملنا في موضوع سوق العمل وتجاوزنا فكرة الفرص وبدينا نحكوا عن وجود نساء بعدد لابأس بيه في الشركات “حاله إفتراضية” كم نسبة السيدات الموجودات في مناصب قيادية في الشركات الليبية, ليش ممكن نسمحوا بتوظيفها بس طول الوقت فيه فكرة “هو هذا أخرك” ما تحاوليش تفكري أنك توصلي لمناصب كبيرة, ليش تحارب لما تحاول أنها توصل لمناصب قيادية ليش صعب في ليبيا أنه نحنا نتخيلوا امرأه في منصب رئيسة وزراء أو حتى رئيسة دولة اذا كان فيه فعلا “مساواة” في المجتمع الليبي متهيالي لازم نواجهوا واقعنا ونعرفوا مشاكله وكيف أنه مشاكله هذي تأثر علينا كبلد على أصعده واجده أفضل من أنه ننكروا ونحاولوا نتظاهروا أنه كل حاجه كويسه لأنه في الحقيقه ما فيش حاجه كويسه.


فاطمة البشاري 
Artwork By : Kate Powell 

Leave a Reply