ليبيات في مجال ريادة الأعمال : مقابلة مع مؤسسة پوم پوم  
May 18, 2015
0
• امتى بدا حبك لشغل اليدوي؟ 
من لما كنت صغيرة عندي شغف تجاه الاشغال اليدوية و الطبخ، بعدها قعدت هواية انَّي نحاول نجمع بين الاثنين بطريقة سمحة و مغرية، لانه من مايحبش شكل الاكل مرتب و حلو؟
اول مرة بديت ندير في الاشغال اليدوية كانت وعمري ١٠ سنوات بعد ماخذيت اول تدريب حقيقي على الموضوع خلال العطلة الصيفية و من يومها وانا منتظمة على حضور ورشات عمل و كورسات عشان نتعلم اكثر كيف نجمع بين الاكل و الاشغال اليدوية.
اول مابديت مشروع پوم-پوم كانت الفكرة في أن نظموا حفلة لا تنسى بلمسة من الرقي؛ انا مقتنعة أن اكثر حاجة تقعد في الذاكرة هي اللمسة الإضافية هذي.
• كيف بديتي بتخطيط للحفلات ؟
بعد حوالي شهرين، قررنا نفصلوا تنظيم الحفلات عن الاشغال اليدوية، عشان نركزوا اكثر على تفاصيل الصغيرة للمناسبات الاصغر.
• من قدملك دعم خلال مشروعك؟
اكثر حاجة ساعدتني، هي الدعم خواتي، حتى وانا عندي الرغبة و القدرة على الشغل لكن ماعنديش الخبرة المالية و الدعائية، مع نصحهن و مساعدتهن حسيت أن المشروع ساهل و ممتع. و مستحيل كنت حننجح و نوصل لمكاني توا بدون أمي، ببساطة عي تعرف كل حاجة على كل حاجة، و انتوا عارفين أن الشغل هذا محتاج معرفة بالتسويق , طبيعة السوق , و ادارة الاعمال، نعتبر فيها منقذتي في الحالات هذي.
• عندك آي نصيحة تحبي تشاركنا بها؟ 
نصيحتي لآي وحدة تبي تبدا بمشروع : ديما ديري الحاجة الي تحبيها عشان تقدري تبدعي فيها، و استمري في مشروعك حتى ان فشلتي أو حسيتي بضغط استمري مهما كانت الظروف.
نصيحة أخرى : لازم توفري خطة عمل. و تحللي مشروعك و تشوفي المخاطر و الربح و تحطي رؤية واضحة لشن تبي بالضبط مهما كان مشروعك صغير، و عمرك ماتحشمي تطلبي نصيحة أو مساعدة من حد، و في البداية خلي جنبك ناس عندك ثقة فيهم و يساعدوك في مشروعك وكيف تخلي شغلك يصير منه، ماتسمعيش حد ينصحك بمخاطرة و يقولك انتِ و حظك، ديما اسمعي كلام الي يشرحلك المطبات و العواقب الي ممكن تواجهيهن ويقولك كيف تغلبي عليهن.
مع تمنياتي بالتوفيق للجميع.
 نجوى بوقعيقيص
 مؤسسة پوم پوم
للمزيد من المعلومات على پوم پوم يمكنك زيارة Pom Pom 

Leave a Reply