Arabic
عيد الأم 
March 21, 2015
1

الصورة المرفقة لوحة للفنان الروسي بُورِيس كُوستودي . تحت عنوان ” الصباح “ . الأسلوب : واقعي .

وانا صغيرة, ماعمريش فكرت في أمي كصديقة. بالعكس, كانت الشخصية اللي تحط في القواعد, الشخص اللي نلوم لما مايكونش مسموحلي نطلع برا مع صحباتي, او الشخص اللي يمنعني من لبس حاجة كنت مقتنعة انها موضة وقتها. لكن بعد ما كبرت, معش قعدت انحق فيها رمز تسلطي, بالعكس, قعدت نشوف فيها احسن صاحبة عندي واللي ديما بجنبي. ولما تفكر فيها. 

مافيش حد اخر يحبك حب أبدي بدون مقابل حتى ولو انت ما عشتش واجد بيش تستحقه, مازالت تبي توفرلك كل حاجة تحبها وتحاول انها ماتنسش تجيبلك العصير المفضل عندك لما تمشي للمحل. وين ممكن تلقى وحدة تقدر روحك الفكاهية وتقولك انك سمحة وتذكرك انك ما تعضيش اظافرك؟  ومن اللي ديما تساعد فيك من غير اي مصلحة شخصية؟ ومن اللي تبيك تنجح في حياتك من غير اي مكافأة لنفسها ( الا التفاخر بيك)؟ من اللي حيعدل عليك لو احتجت لمنديل او حلمت بكابوس, او هل كليت كويس ولالا؟ من اللي ديما يهمها سعادتك وبس؟ وين نقدروا نلقوا شخص صادق ومش اناني بالدرجة هذه؟ الأمهات كائنات مقدسة. عندهن قوة خارقة صقع علينا نفهموهن, الا ممكن لو قعدنا امهات حتى نحن, لأن الأمومة حاجة سحرية وفوق الخيال.  امك حتكون ديما سندك حتى لو كنت في أسوء حالاتك حتعطيك حنان وحب لا حد له. صاح انا توا 22 سنة, لكني عارفة ان يومي مش تمام لو ما كلمتش امي. ومش مهم لو كنت معاها في نفس الحوش, او المدينة, او البلاد, مجرد انك تكلمها بالتليفون وتكبلها شوال الحاجات اللي صارن كلهن. وحتى لما كل حاجة تصكر في وجك تحس انك امك هي الوحيدة اللي ممكن تحل مشاكل العالم كلهن. امك هي اللي تفهم , حتى لو مافهمش حتحاول اتدير روحها صقع وفاهمة عليك. وماتقدرتش تعيبها علشان عمرها وفرق الجيل بينك وبينها. ومع ذلك تقدر تحكي معاها في اي حاجة عادي حتحاول ما تزلطكش. ومهما كان ردها احسن حاجة انك عارف ان مهما صار حتقعد ديما عارف انها هي اللي تقدر اتدردلها لما تصير حاجة. وأحسن حاجة لما هي تسألك ع رأيك, حتى لو كان سؤال تحسه تافه, بالعكس راهو مهم لها. وحتى لو ما توافقتوش على نفس الرأي, عادي. هي اصلا تؤمن بيك أكثر من اي حد اخر. وفي اليوم هذا نحب انقول لأمي كم اني انحبها واجد ونبيها تقرا الكلام هذا وتشوف الناس كيف تشوف فيها. و بمناسبة عيد الأم كل سنة و أمي و كل أم طيبة، شكرا لأنكن أفضل اصدقاءنا، أقرب الناس لنا و قدوة لنا. 

Written By : J.E , Translated by : M.B 

Leave a Reply

1 comment

  1. مبسط وماتع
    حفظ الله أمهاتنا وأصلح ذراريهن