Arabic
شكل المدوّنة الجديد و هبة المتطوعين  
March 30, 2015
0


لو تعدي تشوف المدوّنة ( مشروع سيلفيوم ) حتلقى في تغيير في الموقع وشكله. معش قعد حايس والخط مش واضح واجد نفس من قبل. اول مابدينا كان اكثر التركيز أن الناس يقروا القصص و المقالات اكثر من ستايل الموقع.  ماكانش عندنا مهارات التقنية او الدعم الي يخلينا نصلحوه. لكن الدنيا مازال فيها خير، في مصمم تطوع و أنقذنا و سقّم المدوّنة، الحق أنه ساعدنا من البداية قبل ما حتى نختاروا اسم نهائي للمشروع. 
صمم الشعار و أغلبية القرافكس. مشروع سيلفيوم كله عبارة عن شغل تطوعي من اشخاص في وقت فراغهم. ومن هنا بنديروا shout out لمصممنا.  ونحنا كمؤسسات للمشروع مقدرين الشغل الخيالي هذا كله ونبوا نشكروه في بوست التقدير هذا.
وطبعا مستحيل ننسوا المترجمين، لأنهم بجد من أهم الأجزاء في المشروع وحتى هما يستحقوا shout out. ديما يضحكوا على العربي متاعي، لكن انا عارفة انه معاهم حق، لأنها سيئة :)) 
وديما نحاولوا أنه مانضغطوش عليهم و نستغلوهم لأن عارفين عندهم حياة و التزامات تانية، و اي بوست بالعربي تحسوه ركيك شويا ( نفس هذا ) مش هما كاتبينه. 
أول مرة قريت ترجمتهم وجعتني روحي و شعرت بالأسى لأني مانتبهتش كويس في حصص النحو زمان ، وأي حد يقول أنه الشباب الي توا مايعرفوش يحكوا عربي كويس ماتعرفش على المترجمين متاعنا بس.  مبادرات كيف هذي، ينجحن ويستمرن بمجهودات ناس طيبين، يخلوا عندك أمل في البشرية يتبرعوا بوقت فراغهم عشان قضايا إنسانية و مهمة. 
و أنا نكتب توا خطرت في بالي فكرة نديروا نفس قاعدة البيانات لأي حد يبي يتطوع حتى بساعة من وقته، ( حتلقوا نموذج ممكن تعبوه تحت ) أو أي منظمات او مبادرات يبن متطوعين. 
نحبوا نشكروا فريقنا الي كله متطوعين، على وقتهم ومساعدتهم لنا، ونحاولول قدر الإمكان نشتغلوا حسب سياسة محدودة يعني مش كان حد ضحكلك شويا تبات عنده. لو أنت عندك منظمة أو مشروع، وتبي متطوعين تقدر تعبي نفس النموذج. ممكن نقدروا نساعدوا بعضنا 🙂 
أمثلة على بعض المهارات، ممكن تقعد حتى ترجمة كم سطر من أنجليزي الى عربي أو العكس. 
فريق مشروع سيلفيوم . 

Leave a Reply