رحلتي نحو الاستقلالية
August 14, 2015
1

انا تخرجت من ثانوي سنة 2013 من مركز المتفوقين و قعدنا بطالة ما يقارب سنة ..

 في فترة هذي قلت بدل ما نكملها طياح نشتغل، و اشتغلت في المدرسة الدولية teacher assistant درت المقابلة ولأول مرة ف حياتي ما كنتش مترددة و قبلوني طول و اشتغلت من اول يوم

كانت فعلا من احلى التجارب يلي مريت بيها الوعية في الصبح و الأطفال يلي يضبطوا فيكي اول ما تخشي و كل حاجة ، ولا شعور بعد ينزل الراتب. وتقعدي عارفة انه فلوس هذينا من تعبك انتي حتى لما بتصرفيهن تحسي بشعور سمح .

بعدها بدت الجامعة فسيبت شغل ما قرينش شهر على بعضه الا و بعدها وقفونا و قعدت هي التوقيفة.. بعدها شاءت الاقدار انه ماما سحبت ملفي قبل ما بنغازي تشيل بالكامل و خالتي قدمتلي اون لاين في جامعة عين شمس – كلية الصيدلة .. و قبلوني على العموم في شهر عشرة بدوا في الوقت يلي انا كنت فيه نازحة و ما نندري على الدنيا وين تفتح

بغض النظر عن الشحورة في الابرق و البيضا في عز شتاء مشرق هذك وصلت لي القاهرة و تخيلوا مكان جديد و حوش جديد و تظل تعتبر غربة حتى لو كانت مصر.

بديت جامعة و جيت تقريبا شهر و نص متأخرة أول يوم خشيت فيه للكلية كانوا منزلين جدول الفاينل (نحكيلكمش عالرعب و انا في تلك اللحظة حسيت روحي مش حننجح و جاني شعور what the hell did i get myself into ..
نحكيلكمش طبعا عن لهجتنا النزيكة الي مفش حد في الدول العربية يفهم فيها فقعدت نتكلم مصري و شاطرة فيها بحكم انتي نتفرج على مسلسلاتهم واجد

 و قعدت خبرة في مواصلات حتى ماما بعد جت قعدت تقولي و الله ما شاء الله عليكي وين هذا كله .

المهم شديت حيلي و صار مني و نجحت و كنت الوحيدة يلي نجحت من الناس يلي بدوا معايا .. و جا سمستر الثاني و نجحت و هكي كملت اول سنة صيدلة ,

نصيحتك لأي حد في مكانك ؟

اي وحدة تجيها فرصة انها تقرا ما تضيعهش على روحها مهما قالولك مش أمان أو مش حتقدري أو بلاد تخوف لأنه بالعكس..
اخر حاجة بالنسبة للبنات يلي قرايتهم موقفة عارفة انه انتو محبطين لانها بجد حاجة تقهر بس في اب اسمه Coursera ..  فيه كورسات من جامعات عالمية تحضري محاضرات و تديري امتحانات و تاخدي بيه شهادة معتمدة عالمياً عارفة مش كيف الجامعة بس ممكن يفيدكم

كتابة : تماضر المهدي 

Leave a Reply

1 comment

  1. ربى يوفقك ويكزن بعون كل الطلبه الليبين يااار