Arabic
خوذ_ولا_خلي#
April 24, 2015
0

 

 العنوان ينطبق على حاجات واجد في ليبيا. تجي تحكي يقولولك هي هكي تبي ولا ماتبيش. انا مانقدرش نقبل الظلم و الإقصاء. لما حاجة تقعد مش عادلة و خطأ نساعدوا بعضنا عشان نصلحوها. بعد تقعد مسؤول على حاجة تحاول تلقى حلول مش تسكرها في وجه الناس ( الي داير روحك بتمثلهم و تحل مشاكلهم ).

الأسبوع هدا كان في بوست في قروب على ورشة عمل في القاهرة. اول شرط عشان تنظمي لورشة العمل هذي انك تقعدي خارج ليبيا ( هكي عيني عينك ). لما سألنا شنو السبب؟ هذا يعتبر اقصاء لنا نحنا كنساء ليبيات عايشات هنا؟ الإجابة كانت سفيهة جدا

. هذي السكرينشوت وانتوا احكموا

2

” مخاطرة نجيبوا حد من ليبيا. هكي القوانين، خوذي ولا خلي. ماتزعلنش ماتخدوش الموضوع بطريقة شخصية “

اوكي هو مش خطأ البوست هذا. النساء الليبيات كلهن تقريبا تم معاملتهن بالطريقة هذي لانه حتلقى حد يقولك كثر خيرنا حسبناك على الطاولة الحوار اصلاً؟ ليش دايرات قصة حزينة على تعليق فيسبوك عادي مش لازم منه الاحترام الزايد. لوّ تسمحولي حندير شوية تخمينات هنا : تقريبا تعدادنا خمسة مليون ليبي، تقريبا نصهم يعني 2.5 مليون مرأة ليبية. وخلونا نفرضوا أنه مليون بس من سن 18-25.

هذا تقدير كئيب جدا لكن اهوا فرضية عشان نكملوا الدوة. السيدة متاع الورشة العمل تقريبا تقول لمليون شابة ليبية خوذي ولا خلي. في وحدة ردت عليها على الإقصاء هذا و قالت :

3

” كنت حنكون مهتمة بكل بالورشة هذي لكن انا في داخل ليبيا. حاجة بس مافهمتهش كيف ورشة عمل على ليبيا و يحضروها ناس مش عايشين في ليبيا اساساً؟ “

توا يجي وقت التلسين و السكنان، عارفين نحنا مش على بنك روما وماعندنش مليون دولار زيادة عشان نصرفوهن على ورش العمل و الفيزا . لكن لوّ حطينا ضغط على المنضمات و طالبنا انهم يوقفوا التمييز و الإقصاء هذا الي يمارسوا فيه على الليبين بشفرة وحدة و حاصلين هنا ممكن نديروا تغيير في الوضع. لأنه ماتطلبش حقك بهدوء لازم ادير هرجة عشان تخليهم يسمعوك.

 #Takeitorleaveitاوكي توا شن نبيكم اديروا، تستخدموا هاشتاق #خوذ_ولا_خلي او

وتعلقوا على الموضوع الي فوق أو اي مشكلة واجهاتك من ناحية الإقصاء او عدم الأحترام في اي ورش عمل أو آي مكان اخر . هل انتم راضيين عن الناس الي يختاروها فيها مش تمشي تمثل الليبين . طبعا حتى لوَّ عندكم حلول ياريت تساعدونا. لازم يعرفوا انه التهميش و الإقصاء هذا معش يمشي ونحنا الليبين و الليبيات الي في ليبيا نفهموا و نستحقوا الفرص هذي أكثر من آي حد اخر

Leave a Reply