Arabic
خليكِ نفس سندريلا
November 18, 2015
0




الوحدة فينا تتعب واجد وهي بس تحاول تنسى الحاجات الي حطوهن في راسها و من هي صغيرة، لوّ نجوا نشوفوا حتى نوعية القصص الي كبرنا نسمعوا و نتفرجوا عليهن من سيندريلا، بياض الثلج، الجميلة النائمة، الأميرة و حبة الفولة و رپبانزل كلهن شنو القواسم المشتركة بينهن؟ عشان تقعدي أميرة لازم تكوني جميلة و رقيقة و مادّة وجك تراجي في حد يساعدك، نحنا لا شعوريا نحطوا في الأفكار هذي في روس البنات. خلونا نلقوا نظرة بطريقة اخرى على القصص هذي.


سيندريلا مثلا البنية المظلومة اليتيمة، حاجة تبني عندنا التعاطف والإحساس بالآخر تمام بكل، بعدها نجوا نشوفوا الحفلة، حفلة كاملة فيها جميع انواع البنات عشان حضرة الأمير يختار وحدة منهن، كأنها جو جاكة هكي؟ تبوا بناتكم يحسن أنهن جاكات كل مرة جاي واحد يبحت فيها ويشوف حتعجبه ولا لا؟ هذا اقصى تقدير لذاتنا؟  

بياض الثلج، كله تمام تمام لعند جزء وهي ميتة و يجي الأمير ياخذها، خلونا نفكروا شويا هو شن يبي يدير بالجثة الهامدة؟ مانحسش فيهن سلوكيات إنسان سويّ بس ممكن أنا مركزة واجد. 

الجميلة النائمة، كله اعزقوه، نجوا لجزء النهاية و القُبلة الي حتنقذ كل حاجة، فاطنين نحنا أن الجميلة النائمة راقدة صح؟ و أن الموضوع بلا أذنها؟ خلونا نفكروا فيها شويا و شن تداعيات الشيء هذا مستقبلا كل واحد بينه و بين روحه و الموضوع لشنو يلمّح. 

الأميرة و حبة الفولة، مش مشهورة واجد بس هذي 
قصة الأمير الي كل مرة يجيب في اميرة و يرقدها على 100 فراش ويحط تحت بكل حبة فولة عشان يعرف الأميرة الحقيقية من المزيفة عن طريق انه يسألهن تاني يوم من حست بحبة الفولة وهي راقدة؟ قصدي هذي هي نوعية “الحب و السعادة الأبدية” الي نوهموا بناتنا فيها؟ منافسة بينك وبين عرم بنات اخرى عشان رضا أمير وعشان تقعدي أميرة حقيقية؟ 

ريپانزل، تكمل حياتها محبوسة في البرج تراجي في الأمير ينقذها، تحسوها اسقاط على واقعنا صح؟ 

مفروض ننتبهوا نحنا في شن نحطوا في عقل الأطفال الباطن، انا شخصيا مؤمنة بأي حاجة تقراها وانت صغير تقعد جزء منك مستقبلا و بطريقة أو بأخرى حتأثر فيك لذلك خلونا نركزوا نحنا في شن نقولوا أو نورّوا لأطفالنا. 

بعد خطرها لوّ اتديروا بحث على نهايات قصص الإخوة قريم الحقيقية حتكشفوا حقائق مفزعة القصص مش شور أفلام ديزني بكل، يعني شنو الغرض من أن نستمروا نحكوا في قصص مشوهة؟ 

كما أن في مدونة سابقة دويت على  قائمة كتب 
ممكن نستخدموها كبديل للقصص التقليدية، تقدروا تطّلعوا عليهن هنا:
إذا كنت تريد أطفالك أذكياء 

Artwork by : Rosie Payne 

Leave a Reply