Arabic
بعد درت بوست في قروب نسائي في فيسبوك
December 23, 2014
1

كنت قاعدة فاضية ونراجي في الضي يجي، فجأة خطرت في بالي ندير استطلاع رأي بعقاب شحن المايفاي والموبايل، خشيت على اكبر قروب نسائي نعرفه في الفيسبوك ( مانقدرش نذكر اسماء) وقررت نسألهن، كيف يعرفن في الفيمينزم ” الأنثوية“ وشن حقوقهن؟ وهل المطالبة بالمساواة حاجة خطأ ؟ اكيدة طبعا انا كنت نراجي في الي حتجيني وتقولي ” الإسلام عطنا حقوق، في شن تحكي انتِ؟! “ و بعد مانقول انه هذا الي كنت نراجي فيه مش الغرض الإستهزاء لا سمح الله لكن نقولكم بأمانة بس شن صار و شن كنت متوقعة من التجربة ( اعتبروها بحث علمي ) . انا عارفة انه بعد مانحكي على فيمينزم بصفة عامة لازم يطلع حد ويقولي نفس التعليق هذا، يحسسوا فيها انه مش مسلمة كيفهم وكأني قاعدة نطالب بالتعري و الكفر. انا مسلمة و في مقالة كتبتها من قبل على انه كيف الإسلام لا يتعارض مع الفيمينزم الي انا نعيط بيها، لكن المهم نجوا نشرحوا الكومنت توا، طبعا الإسلام عطنا حقوق وهذي نقدروا نعتبروها حاجة كمسلمين كلنا عارفينها، لكن وين الحقوق هذي على ارض الواقع؟ يعني ماتقولش عندك حقوق افتراضية و انا مفروض نقول صح معاك حق ماصح وجي في شن نحكي انا .. بس الغرض من المقالة هذي مش رأيي انا (انا فيمينست للنخاع ) واي حد قرا مقالاتي من قبل استنتجها، لكن رأي النساء في القروب هذي هو المحور الاساسي في المقالة هذي مش رأيي انا . وهذينا بعض التعليقات بخصوص الموضوع : ( حولت الأسماء بناءا على طلب الاشخاص بعد ما سألت اذا   ممكن ننشر التعليقات ولا لا

تعليق رقم واحد : انا من رايي ان للمرأة حقوق وليس لها حرية مطلقة يعني من حقها ان تخدم وتسوق وتكمل قرايتها لكن داخل اطار الاحتشام وارتداء المستور وتنقص من ظاهرة المهرج الي نشوفوا فيهم كل صبح وعشية .

التعليق رقم اثنين رد على تعليق رقم واحد : ولا الرجل ليه حريه مطلقه مفروض حتى هو كل تصرفاته تكون داخل اطار الحشمة الأدب غير مجتمعنا الله يهديه.

هذا رد على البوست متاعيالخدمة والسواقة والقراية هادو مش حقوق راهو هادو من اساسيات الحياة مسلمات يعني مافيهمش نقاش لكن كملوا كملوا بنتفرج بنستمتع بوست جميل

 

ربي يحاسب المرأة والرجل نفس الشيء . ولا فرق بين عربي ولا أعجمي الا بالتقوى . الدين ما قالش ان الراجل خير من المراة قال يصرف عليها بس . ما قالش المراة ما عندهاش حقوق . واخدين فكرة غلط احنا كمجتمع

شوفوا دول زي ماليزيا دول إسلامية كيف تعامل في المرأة، والمرأة الي يموت راجلها او تطلق ؟ مش عندها صغار لازم توكلهم . تولي هي رب البيت ومعظم الدول مقدرة الامور هادي!

Feminism بالنسبة ليا تعني ان المرأة يكون عندها حقوق ما لم تعترض مع الدين ومحد وصي عليها يعني محد من حقه ياخدها منها لو هي راغبه فيها زي الشغل و الدراسة والسواقة حتى الزوج لكن ف نفس الوقت ما يعنيش انها لو تنازلت او ضحت بالحقوق هذه انها عديمة الشخصية هذا حقها وهي حرة ف خيارها ولازم نوصلوا لمرحله نحتسبوا البنت والولد زي بعض مش مبدأ العيب لان المجتمع هكي متقبل، يعني لو الولد يدخن عادي لكن البنت مش متربيه! الدخان لو بتشوفله من منطوق ديني فالاتفاق انه حرام يعني ع الجنسين زي الزنا والمعاكسة ان لما الولد يعاكس بنت ما نقولوش جاباته لروحها شوفوا شن لابسة انما يتعلم يغض بصره ويحترم نفسه وانه مش بروحه ف الجامعة او الشارع او او او.

. موضوع حلو هلبا و شكلك تبي تكتبي بحـث أو ريبورت نقولك انا رأيي :حقوق المرأة تكمن في حريتها و تحقيقها لذاتها يعني من وجهة نظري أنها تكون ناجحة في حياتها و تحقق أهدافها و طموحاتها اللي بنفس الوقت تكون مفيدة لنفسها و لغيرها و لمجتمعها .. يعني يا ريت لو نماروا نساء الغرب في علمهم و تقافتهم و حقوقنا ناخدوها ف التعليم و العمل و تولي مناصب سياسية بش نقيموا دوله معتدلة يتساوى فيها الرجال و النساء في بناء مجتمعهم و دولتهم ..

 باختصار حرية الانسان تنتهي حيث تبدا حرية الاخرين . المرأة من حقها تتخذ قراراتها و تدير شن تطمح وتحلم و مفيش اي انسان سوي بيقول ان الحرية هي الانحلال والعري لكن مجتمعاتنا الغبية لما تقوليلهم حرية المرأة يقولولك تبي المرأة تقعد عريانة والاسلام اعطاها حقوقها وبلا بلا المرأة فالمجتمعات المسلمة شدي عندك شن صايرلها.. خوها يتربى علي انه من حقه يضربها لو قالت راي ما عجباش ولو هزبها ووقفاته عند حده و لو لعبت مع صاحباتها وهو حاقد عليها وقاللها خشي و رفضت.. و لو قاللها جيبيلي طاسة مية و ما جابتهاش . و المرأة فالمجتمعات متاعنا كبرت علي ان شرف العائلات بين افخاذ النساء فقط وان الراجل الزاني السكير الفاجر ما ينقصش منه شي و توا يعقل. و المرأة في مجتمعاتنا منعوها تقرا جامعة لان الجامعة للصايعات ومنعوها تقرا بعد الثانوي لان نهايتها كوجينة . ولو قرت فالجامعة يختارولها شن تقرا لانه ممنوع تخدم وظايف معينة وفالآخر نهايتها ابلة. المرأة ف مجتمعنا يضربها خوها و يضربها زوجها ويقولولها عادي الرجال قوامون علي النساء ويقولولها فاضربوهن.. حتي لو الراجل فاسد و عاهر و حمار و غبي.. المرأة ف مجتمعاتنا لو تخدم راجلها ياخذ مرتبها بحجة انه شن ناقصها وتساعده ف مصروف البيت . المراة ف مجتمعاتنا راجلها يزني و يفجر و يظلم و يقطعها تقطيع ولو طلبت الطلاق يطلعوها اكيد هي متنفعش . المراة ف مجتمعاتنا لو ساقت سيارة و كانت حتي مايكل شوماخر يجي واحد عجل حمار يسوق غلط و يرفس ويدفل عليها من الروشن زيادة ويقولها سواقة نساوين المراة ف مجتمعنا الراجل يهزبها و يقولها يا حيوانة يا كلبة، ولو ثارت وقالت. لا بصوت عالي يقولها مش متربية.. المراة ف مجتمعنا لو تعرضت للتحرش.. ركزوا تحرش مش اغتصاب .. ح يقولوا هي السبب.. لانها مش كويسة.. ولو تعرضت للاغتصاب راجلها يطلقها ولو مش متزوجة عيلتها يفكروا كيف يدفنوها..

 اول شي انا عارفة ان حنا مسلمين والدين الاسلامي عطي للمراة حقوقها صح جدا .. بس المجتمع قاعدة فيه عقلية متخلفة وماتشوفوش لطرابلس نعرف انه سواقة وخدمة عاادي جدا و هلبة بنات يسوقوا بس في مناطق تانية تشوف لاشياء انها عيييب . المراة من حقها تخدم وتسوق وتقرا وتوصل لاعلي المراتب وتثبت ذاتها لنفسها .. حتي تحس بالسعادة والرضا ناحية ذاتها .. بس لما يجي حد يقول اصلا راجلك شهادتك والبنت مكانها فالكوجينا *_* كأنه انا معنديش رأي ولا أحلام ولاطموح ولا أهداف . كأن انا انولدت فالدنيااا بس خاطر هدفي الوحييييييييد أنه نتزووج ؟؟؟ . يعني وظيفتي نرضيه هو بس ونجيب صغار!!! انا هنا مش حيعجبني الكلام . يعني مش البنت اصلا كل ما تكون واعية وتفهم ومثقفة تبدا قادرة اكتر انها تربي صغارها أحسن وصح … وتبدا تعرف تتعامل مع زوجها ؟؟ كان هما يهزو ع القراية والشهادة . يعني مش يجي حد يقولي انتي بنت اسكتي معندكش راي ولا متعرفيش تفكري ولا البنات تافهات ويقولوا المرا ناقصة دين من جهلهم . بدا يقول في كلام فيه تفرقة عنصرية … انا ضد الشي هدا المراة لازم تحترم وتقدر وتاخد فرصة انها تكون في مناصب عالية .. وكله بأحترام . ومتنسوش انه من أفضل الحقب التاريخية فالعالم وحدة منهم اسمها The Golden age حكمت فيها الملكة اليزابيث .. كانت مراة . لان المراة وقت توزن بين العاطفة والعقل وتاخد فرصة حتتوصل لافضل النتائج ..

 الخدمة السواقة والتعليم هادي في مجتمعنا يشوفوا فيها حقوق بينما هي مش حقوق هادي مسلمات واكثر من مرة نقول فيها الحقوق شن هي؟ انك يكون عندك حق المواطنة زيك زي الرجل حق اﻻنتخاب زيك زيه صوتك يساوي صوته وتقدر تكون رئيسة واﻻ طبيبة واﻻ اي شي هيا تبي تخدمه من غير ما حد يوقف في وجهها .. ان تكون المراة حرة نفسها ومالها هيا تقرر امتى تتزوج ومن تتزوج وامتى تطلق ومن غير ما يمنعها حد .. ان يكون للمرأة حق اﻻحترام وتتعامل كإنسانة زيها زي زوجها مش يعاملها كأنها خدامة واﻻ كرسي واﻻ سيارة شاريها بفلوسه.. لكن طبعا هدا كله مايمشيش مع المجتمعات المتخلفة .

طبعا هذي نهاية التعليقات بعد ساعة من نشر البوست هذا. طبعا بوستات على مواضيع مهمة نادرا ماتحصل اهتمام يعني ككل حصلت ١٠ لايكس و في حدود ٢٥ تعليق . مافيش مقارنة طبعا بينهن وبين بوستات راجلي جابلي و تعاركت مع عمتي لكن الحمد لله حسيت انه في امل في المتجمع و نبي نقول من هنا شكرا لكل وحدة بذلت مجهود وشاركت معانا في استطلاع الرأي البسيط هذا، واذا هامكم الموضوع يس الضي جا .

Written By : J.E

Leave a Reply