Arabic
النساء الليبيات : مكون عائلي تُسيره الحكومة ؟
December 30, 2014
2

IMG_0508-0.JPG
لوحة للفنان الروسي إليا ريپين . تحت عنوان ” الإجتماع الرسمي للبرلمان الروسي، السابع من مايو، 1901 “ . النوع : لوحة تاريخية. الأسلوب : واقعي

في السادس عشر من يوليو لسنة 2013، وافق المؤتمر الوطني العام على قانون انتخاب لجنة صياغة الدستور، الي حدد قوانين إنتخاب لجنة الستين، الي حتقوم بوضع مسودة دستور ليبيا. بعد رفض مطالبات بتخصيص 15 مقعد للنساء وتم تعيين 6 مقاعد فقط من اصل 60 .
الخطوة هذي كانت علامة توضح انه موضوع حقوق المرأة ومشاكلهاحيتم تهميشها في الدستور، لانه في مشاكل ”بأهمية اكبر“ حتسيطر على المفاوضات و عملية الحوار. الوضع السياسي والامني المتذبذب في ليبيا اثر في مدى مساهمة المرأة في المجتمع المدني و السياسي الليبي .
اغلب تنبوؤات الليبيين بمسودة الدستور غير مبشرة بخير، عشان لجنة الستين فشلت في التمثيل المرجو منه لليبيين واختلافاتهم . لكن بعد ماقريت المسودة الي طلعت في ذكرى 63 لإستقلال ليبيا، خفت على حقوق المرأة في ليبيا.
في عدة قوانين و قيود على حقوق الإنسان في المسودة. مادة 10 ( بخصوص الجنسية ) : تقول انه النساء الليبيات مازلن غير قادرات على اعطاء الجنسية الليبية لاطفالهن. على حسب ما جاء في اخر تقرير لمركز كارتر على مسودة الدستور الليبي لسنة 2014، في مايقارب 5,500 امرأة ليبية متزوجة بغير ليبي. واجد منهن عايشات مع ازواجهن واطفالهن في ليبيا. المحامين الليبين حاولوا لسنوات تصحيح ظلم القانون الي يمنع اطفال الليبيات من التمتع بنفس حقوق اطفال الرجال الليبين المتزوجين بغير ليبيات.
حقيقة انه القانون هذا مازال موجود في مسودة الدستور انتكاسة و مقلق بالنسبة لمستقبل حقوق المرأة في ليبيا، ومن الجلي انه القانون ماشي مع فتوى مفتي الديار الليبية الشيخ صادق الغرياني في مارس 2013، بطلب يقتضي منع الليبيات من الزواج بأجانب.
في ثالث جزء من المسودة ( بند الإجتماعي والثقافي ) مادة 28 : اول اسطر شملت انه المرأة عبارة عن اساس للمجتمع، والحكومة حتشجع وتدعم الشباب على الزواج. لكن الفقرة الثانية تقول انه الدولة الليبية حترعى الام والطفل و تساعد النساء لإيجاد توافق بين العائلة والعمل. انا بكل صراحة قريت الفقرة كم مرة، لكن مع ذلك ماقدرتش نفهم شن المقصود بالضبط. يعني قصدهم انه حيتحكموا و يقللوا ساعات الشغل للنساء اذا عندهن عائلات؟ ولا حيمنعوهن من المشاركة في نشاطات اخرى؟ بمعنى اخر الدولة الليبية حتحكم في ساعات عمل وحياة النساء بصفة عامة وخاصة هنا؟
اكثر من نصف التعداد السكاني لليبيا، نساء.
النساء الليبيات يحركن المجتمع المدني بالنسبة كبيرة . شاركنا في 2011 بطرق متعددة، و مازلنا نشاركوا بغض النظر عن استهداف النشطاء و انتهاكات حقوق الإنسان الي يصيرن.
نحنا جزء مهم من كل تغيير في ليبيا، لكن مع ذلك معاناتنا ماتبيش تكمل في ” الديمقراطية الجديدة “ مازال عندنا مشوار طويل.
منظمة ”محامي العدالة“ في ليبيا اطلقوا حملة نقاش على الإنترنت بخصوص مسودة الدستور واهم العناصر في دستور ليبيا المستقبلي
مع تحليل للمسودة، الشعب الليبي و المجتمع المدني الليبي مفروض يتحرك و يبعث توصياتهم و رفضهم للمسودة للجنة الستين. اصوات النساء لازم تسمع في الوقت الحرج هذا.
اطفالنا لازم ياخذوا حقوقهم كاملة كيف الاطفال الاخرين، حرية تحديد مصير وكيفية التعامل مع حياتنا الشخصية والعملية مفروض ترجعلنا نحنا . من حقنا تنزوجوا الشخص الي نبوه بغض النظر عن جنسيته. الدولة مفروض توفر بيئة امنة و مناسبة عشان نقدروا نشاركوا و نبدعوا في اي نشاط نختاروه، عشان كلنا نبنوا ليبيا مع بعضنا.

ترجمة : ج .

Leave a Reply

2 comments

  1. مع تسجيل إجابي الشديد بالحديث السابق، أسجل إعتراض على نقطة أن النساء يشكلن أكثر ن نصف المجتمع الليبي فهي معلومة غير دقيقية، معظمات مجتمعات العالم الأغلبية فيها للنساء، ولكن بحسب المسح الوطني للسكان بليبيا سنة 2012 فإن النساء لا يتجاوزن ال49%

    1. العبارة مجازية لتوضيح انه المرأة 🙂