Arabic
المرأة الليبية لو كانت راجل – شوية فلسفة
December 12, 2014
2

IMG_0011.JPG
لما نقولوا ان الانثوية تبي المساواة في الحقوق بين الذكور والاناث. معناها ان اللامساواة هي القايمة, وقبل ما الواحد يطالب بالاصلاح لازم نعرفوا شنو هو الغلط, ولهذا السبب حنراجعوا بعض الأشياء التالية:

الحرية: اختي القارئة عمرك فكرتي شنو تكون حياتك لو اوتلدتي ذكرا؟ وأخي القارئ تخيل شوية لدقيقة هكي كيف حتكون حياتك لو اوتلدت انثى؟طبعا التغيير حيكون كبير مش بس في الشكل والقوام, بل في الشخصية والهوية. كلنا نعرفوا ان في اشياء وخصائص معينة ما نقدروش نختاروها في الحياة; كيف اسمي, وجنسي, ووقت ومكان ميلادي, وابي وامي الخ… والانسانية ما هي الا احترامنا لبعضنا خصوصا الخصائص الي برا ارادتنا.وانها غاية ومش وسيلة. والعيب ديما يكون في الخصائص اللي نختاروها, مش الخصائص اللي برا سيطرتنا. مثلا، وخلوني ناخدها من زاوية وجودية شوية، اللي يرتكب جريمة يعاقبه القانون لانه اختار الخروج عن القانون، واللي يسيء معاملة الناس ومايحترمش حد، نعتبروه انه هو اللي اختار هكي. لكن عمركم شفتوا ان واحد حبسوه علشان اوتلد في يوم معين؟ او لانه لونه ابيض او اسمر؟ او لانه باته فلان او علان؟ بالطبع لا، لان الشخص هذا ما اخترش الخصائص هذينا، بل انفرضن عليه.
•الانسانية: سؤال واحد اخر، شنو اللي يميز الانسان عن الحيوان؟ انتمنى لو نقدر نسمع اجاباتكم عالواقع، ولكن للآن ياريت تفكروا او تكتبوا اي اجابة قدامكم. لنفترضوا ان احد الاجابات كانت الفن؟ لان الانسان يقدر يرسم وينحت اشكال تفرق عن الحيوان. حاجة اخرى ممكن تكون الدين، فالحيوانات على مدى التاريخ، ماعندنش عليها اي دلائل على طقوس دينية الخ. وممكن تقولوا المنطق، والعلوم بما فيها الانسانية والطبيعية. توا لما ناخدوا الأمثلة هذينا كلهن حنلقوا أن الانسان، الذكر والانثى -وحتى اللي مش عارف روحه شنو- كلهم يتمتعوا بنفس الخصائص. الراجل والمراة يعبدوا ربهم بنفس الطريقة، ويستخدموا منطقهم بنفس الطريقة، والعلماء الطبيعيين -العباقرة- في منهم رجالة وصبايا. مثلا المسألة الرياضية يقدروا يحلوها الاثنين كيف بعضهم. وممكن هكي نقولوا ان نحن ساوينا بين الذكر والانثى.

سؤال • لكن في اللي حيقول، ليش السياسيين الذكور اكثر من الاناث؟ ليش العلماء الذكور المشهورين واللي حصلوا جوائز اكثر من الاناث؟ ليش على مر التاريخ الرؤساء والملوك والقادة كانوا رجال؟ الخ الخ. طبعا، نقدروا انقولوا ان السبب مش طبيعي بحت، ولكن السبب وراءه هو المجتمع والبيئة الثقافية. كيف؟ النساء ماقعدنش يتمتعن ببعض من حقوقهن الا في الفترة الاخيرة، مثلا الامريكيات قعدن يقدرن يشاركن بصوتهن في الانتخابات لأول مرة عام 1920. والفرنسيات عام 1945. ولما يكون الراجل هو اللي يحصل التعليم وفرص الشغل اكثر من النساء، اكيد حيتفوق عليهن. لان التاريخ اختزل المراة في انها تكون ربة بيت. عبدة لزوجها وحوشها. وبالطريقة هذه سكروا عليها السبل انها تبدع. ولو واحد قاللي بلكي لانها ماعندهش القوة، نقوله عدي شوف مثلا كاثرين الكبرى واللي حكمت روسيا العظيمة لأكثر من 34 سنة. وفي اللي عنده ان المراة ناقصة عقل ومش ذكية، نقوله شوف ماري بيير كيوري، كانت مراة، وفي البداية ما قبلتهش الجامعة علشان هي انثى, ولكن بعدين, قعدت هي الوحيدة بين جميع العلماء -بما فيهم الذكور- على مر التاريخ، فازت بجائزتي نوبل في فرعين مختلفين علميين! والكلام السابق ما يدلش الا على الاجحاف والعداء اللي يكنه المجتمع في اي مكان ضد المرأة.

سؤال • سألني مرة واحد صاحبي وقاللي كيف تبي مساواة بين الرجل والمرأة؟ المراة تختلف عن الراجل وهي أضعف منه وعلشان هكي مفروض مافيش مساواة. ولما سألته كيف هي أضعف من الراجل؟ قاللي تخايل حطيناهم في حلبة قتال، راجل عادي ومراة عادية من اللي يفوز؟ قلتله في الغالب الراجل، لكن لو حطيتلك تمساح او نمر عادي وراجل عادي، من اللي يفوز؟ هل فوز الحيوان يخليه احسن من الانسان الرجل؟ لا بالطبع، معناها الأمر يمشي حتى مع مثال المرأة. لان الاسقاط هذا اسقاط فاسد، وكيف ما بيننا امبدري، ان تفوق الانسان عن الحيوان كله في الفن والادب والعلوم وهذينا حاجات اثبتنا ان الراجل والمراة على قدم المساواة في القدرات الطبيعية. المرأة وبالذات الليبية الانثوية *فيمنست* هي وحدها اللي تقدر تفك حقها بروحها وترد مكانتها الطبيعية والمتساوية مع الراجل.

Written by : M.B

Leave a Reply

2 comments

  1. اللي يفرق الإنسان عن الحيوان البناء
    الإنسان له تاريخ وكل واحد يبني فوق اللي سبقة