Arabic
الدولار راكبه فيه النار ، و الدبش معاش لحقنا عليه
October 18, 2015
0

حد يتذكر أيام العز لما كان الدولار بـ1.35 دينار؟ الله الله.

الحرب الاخيرة اللي معاش انتهت و الامن اللي معاش استتب أثروا في حياتنا بطريقة شنيعة، من ناحية النزوح و الشغل و التعليم الموقف و تصدير النفط الراقد و الشوارع المسكرات…إلخ.

بالطبع هذه العوامل تؤدي إلى انهيار قيمة العملة الليبية، بالعربي: لما تبي توصي جاكة من وحدة من الـصفحات اللي تجيب في دبش اونلاين، نفترض الجاكة هذه بـ25 دولار، تحت الظروف الطبيعية كانت حتكون في حدود الـ35 دينار يعني تعتبر يا بلاش.

لكن مع الحرب و مصارفنا اللي شبه موقفة، أصبحت السوق السوداء هي الحل الوحيد لشراء الدولار لذا في عوض تكون الجاكة بـ35 حتكون بـ65 و هذا مجرد افتراض.

طبعا موضوع ارتفاع الدولار و اليورو خليهن على جنب لأنهن كوم، و نصابة التجار كوم ثاني.

خلّوني نحكيلكم، في يوم من الأيام صحبتي قالتلي كانت تدوّر في دبش اونلاين فخشّت موقع Pull&Bear و خطم عليها set يعني مجموعة خواتم بـ6 يورو. ما علينا، طلعت بعدها لمحل برضو تشوف في دبش، لقت نفس الـset بـ45 دينار…

اليورو يعني في اسوأ أحواله وصل 3.5 دينار و نزل بعدها يعني الخواتم يطلعن بـ21 دينار على بعضهن، عليش زايد فوقهن 24 دينار!؟ على من تضحك!؟

…سأترك لكم التعليق.

الكلام هذا كله على الدبش بس. خليني من المواد الغذائية اللي وصلت لثلاثة اضعاف سعرها، خليني من المدارس الخاصّة اللي خلّت السنة بـ2500 و 3000 للإبتدائي، خليني من الإيجارات اللي وصلت لأقصى حدها.

الإهتمام بإقتصاد و سياسة الدولة مهم جدا، ما يعتبرش فقط ثقافة، لأن بكرا بعد بكرا حتى كيكة معاش حتقدري اتديريها من الأسعار الشايطة. غير ان ليبيا المستقبل محتاجتك و محتاجة الأجيال اللي حتربيها.

ربي يصلح حال البلاد و العباد و السلام عليكم و رحمة الله وبركاته

By @assmabenmussa

Leave a Reply