Arabic
الأدب الروسي وكيف غيرني 
November 15, 2015
0





   مافيش فينا حد ماسمعش على الجريمة و العقاب، الحرب و السلم، دكتور جيفاقو، الأخوة كارمازوف، الأباء و الأبناء أنا كارنينا، لوليتا و ما الى ذلك من اشهر أعمال الأدب الروسي، حتى اذا كنت ماتعرفش أنهن أعمال روس أو من كتبهن أكيدة سامع الأسماء هذي من قبل، كمدمنة أدب روسي اول تعليق نسمع فيه، تي الكتاب هذا طويل بكل كيف عندك راس؟! اوكي حتى انا إنسان و مرات نمل وانا نقرا لكن فكرة الي تخلي فيا مكبدة على الأدب الروسي هكي هي أن  الروس أكثر حاجة يركزوا على بناء الشخصية، بعد كم فصل، الشخصية هذي معش تقعد مجرد شخصية، تقعد إنسان بكامل تناقضاته و مشاعره و أفكاره، مرات تحس روحك تبحت في مرايا لأعماق أعماقك و تخليك تفهم مشاعرك و روحك كيف ماعمركش فهمتها من قبل. 


أول حاجة يعلمك كيف تتمرد، يعني أكثر شخصيات الروس تلقى عندهم مبدأ التمرد على المجتمع أو النظام و عدم القبول بالمسّلمات، يربي عندك مبدأ انك تفكر بروحك، يخليك ثوري هكي و شخص عندك مبدأ . يساعدك تفهم الناس كيف يفكروا، تشوف شخصية تلقاه قتل حد مرة عشان بيقتل بس، بعدها تلقى نفس الشخص هذا يتوب و يتغير و يقعد كويس، تلقى شخصية تسرق لكن قبل ماتعدي تنتحر تبرع بكل حاجة عندها عشان عائلة فقيرة. ممكن بائعة هوى و تشوف شن وصلها لمرحلة هذي و كيف تنقذ حياتها أو تنهيها، يخليك تبطل تصنف الناس الى طيب و شرير يخليك تفكر الشخص هذا شن وصله للمرحلة هذي اصلا؟ في خيانة و قتل و حروب و ثورات حاجة ممكن تلقاها في آي أدب اخر لكن مافيش حد أبدع في نظري بطريقة الروس في وصف الإنسانيتنا و تجاربنا ونظرا لأنهم شعب مرّ بأباطرة، حروب أهلية، ثورات. حروب عالمية وما الى ذلك . 

مخيلة  قوقول تخليك مقتنع وانت تقرا أن ممكن في يوم من الأيام راجل ينوض يلقى خشمه مش قاعد ويقعد يبرم في الشارع يدور عليه.  دوستويفسكي مهما كانت شخصياته تصرفاتهن عبيطة، مثلا واحد في بار ويبدا يحكي في قصة حياته لواحد اخر مايعرفش بكل، بس بطريقة ما هكي تحسها حاجة عادية جدا و انت تقرا. ولا تولستوي بعد مايوثقلك معركة تاريخية بين روسيا و فرنسا و يخليك تحقد على نابليون كيف ما هو يحقد عليه و تحس روحك قاعد ماسك سلاح معاهم في الجبهة. 
ولا بعد تورجنيف ياخذ مبدأ العدمية و يحطه لك في دراما عائلية مع و صف خيالي للطبيعة و يختمها بقتل المبدأ بكل لدرجة تقعد مصدوم و تفكر أنا شن قريت بالضبط .. ولا قوركي بعد يفصفصلك الشيوعية و يعرضلك معاناة العمال و كيف يهربوا في الكتب و يقروا و يغيروا من أنفسهم، كيف أم تنتقل من الأمية و ضعف الشخصية إلى رمز لثورة كاملة. ولا تشيكوف في قصصه القصيرة الي تكملها في قعدة  بعد يعطيك هدف غير طبيعي في حياة و يقولك إذا مسدس طلع في الفصل الأول تأكد أن حتسمع رصاصة في الفصل الأخير، كأنه يقولك يعني بما أنك قاعد هنا معناها قاعد هنا لسبب مش هكي وخلاص حتى لوّ حسيت روحك بلا فايدة. 

الأدب الروسي إذا قريته في 18, او 20, 25, 30, 70 ديما حتشوفه بنظرة أخرى ديما حتفهم منه حاجة جديدة مهما عاودت قريته ديما في مايزيد في شخصيتك و تفكيرك، يخلي لمعاناتك هدف، يخليك تتمرد، يخليك إنسان. 

نحنا مهتمين ببناء الإنسان، لذلك حسينا حاجة نفس الأدب الروسي ماعندهش شعبية واجدة عند الليبين بصفة عامة تستحق أن نحكوا عليها في  السطرين هذينا ممكن تساعد و تبني حد كيف ما ساهم الأدب الروسي في بنائي. 

Artwork By : Adam Tan RIP 

Leave a Reply